f_150_100_15790320_00_images_News_122016_shinjin__DSC0511.JPG

Јаҥар айдыҥ 16-чы кӱнинде  Национальный театрда Россия Федерацияныҥ культуразыныҥ Нерелӱ ишчизи, СССР-диҥ бичиичилер Бирлигиниҥ турчызы,  Алтай Республиканыҥ албатылык кайчызы Таныспай (Иван) Боксурович Шинжинниҥ 80 јажына учурлай юбилейлик эҥир-концерт ӧтти. Таныспай Боксуровичти уткыырга келгендер бу јайалталу, јӱреги јымжак кижиниҥ јӱрӱми керегинде фотојуруктардаҥ ла кӧргӱзилген кинофильмнеҥ кӧрӱп, кем де байла, кожо ӧскӧн ӧйлӧрин эске алынып турды. 

Айылчылардыҥ ортозында кӧп тоолу балдар болды. Бу јиит ӱйе албатылык кайчыныҥ Т.Шинжинниҥ јайаандыгыла јилбиркеп турганы сӱӱндирет ле оморкодот. Байла, оныҥ да учун эҥир «Кай» деп адалган театрлык кӧргӱзӱле башталды. Бу юбилейлик эҥирде кӧп тоолу јылу уткуулдар айдылды. Алтай Республиканыҥ культура Министриниҥ адынаҥ уткуулду сӧсти оныҥ ордынчызы С.Н.Пешперова јетирди.

Бу јылу, телкем эҥирде јуулгандар кайга, Т.Шинжинниҥ јӱрӱмдик јолына учурлалган кожоҥ-бије, ӱлгерлер, алтай кӱӱлик ойноткылар кӧрӱп-уктылар. Бу ары јанынаҥ јайалталу кижи керегинде айдар болзо, Таныспай Боксурович 1936 јылда Оҥдой аймата Кичӱ Ӱлегем деп ӧзӱктӧ чыккан.

Таныспай Баксурович 1936 јылда Оҥдой аймактагы Кичӱ Ӱлегем деп ӧзӧктӧ чыккан. 4 јаштуда ӧскӱс арткан бала аказыныҥ билезинде чыдаган. Бир-канча шылтактардаҥ улам Горно-Алтайсктагы балдардыҥ туразына кирип, тӧрт јылдыҥ туркунына анда ӧскӧн. Оныҥ кийнинде областьтагы национальный школго кирип, оны ӱренип божоткон.

Горно-Алтайсктагы педагогический институты божодып алтай тилдиҥ ӱредӱчизи болуп јӱрӱмниҥ јолына чыккан.  Бир-канча ӧйдӧҥ Т.Шинжин Горно-Алтайсктагы тӱӱки, тил ле литератураныҥ билим иштердиҥ институдына ишке кирген.  Кудайдаҥ берилген јайалта јайа тартып, Т.Шинжин ӱлгерлер, куучындар, алтай албатыныҥ фольклорына учурлай билим бичимелдер бичип чыгарган. Кайчы болгон адында Таныспай Боксурович кайчылар керегинде билим бедиреништӱ иштер ӧткӱрип 300 билим бичимел бичиген. Јаан деген кай чӧрчӧктӧрдӧҥ 13 кирезин сагышла айдат. «Улу кайчы А.Г. Калкин» деп адалган монографияныҥ авторы.

  

 f_150_100_15790320_00_images_News_122016_shinjin__DSC0502.JPG f_150_100_15790320_00_images_News_122016_shinjin__DSC0513.JPG f_150_100_15790320_00_images_News_122016_shinjin__DSC0519.JPG f_150_100_15790320_00_images_News_122016_shinjin__DSC0526.JPG

Joomla SEF URLs by Artio